ರಾಣಿ ಚೆನ್ನಮ್ಮ ವಿವಿ ಹುದ್ದೆ ನೇಮಕದಲ್ಲಿ ಅವ್ಯವಹಾರ ?

                                                                  ರಾಜು ಉಸ್ತಾದ್ ಬೆಳಗಾವಿ

ರಾಣಿ ಚೆನ್ನಮ್ಮ ವಿಶ್ವವಿದ್ಯಾಲಯದ ನಾನಾ ಹುದ್ದೆಗಳು ನಿರ್ದಿಷ್ಟ ಮೊತ್ತಕ್ಕೆ ಮಾರಾಟವಾಗಿವೆ ಎಂಬ ಮಾತು ಈಗ ಎಲ್ಲೆಡೆ ಕೇಳಿ ಬರುತ್ತಿದೆ.

ರಾಣಿ ಚನ್ನಮ್ಮ ವಿವಿಯಲ್ಲಿ ಏನೆಲ್ಲ ನಡೆಯುತ್ತಿದ್ದರೂ ವ್ಯವಸ್ಥೆ ಮೌನವಾಗಿದೆ. ಇದರಿಂದ ಆರ್‌ಸಿಯು ಪ್ರಗತಿಗೆ ಪ್ರಗತಿಗೆ ಭಾರಿ ಪೆಟ್ಟು ಬಿದ್ದಿದೆ. ಸರಕಾರ ತಕ್ಷಣ ಎಚ್ಚೆತ್ತುಕೊಳ್ಳಬೇಕು. ಉನ್ನತ ಶಿಕ್ಷಣದ ಜವಾಬ್ದಾರಿ ಹೊತ್ತಿರುವ ಸಚಿವ ಸಿ.ಟಿ. ರವಿ ಇತ್ತ ಗಮನ ಕೊಡಬೇಕೆಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.

ಇತರೆ ಬೇರೆ ವಿಷಯಕ್ಕೆ ಬೀದಿಗಿಳಿಯುವ ಎಬಿವಿಪಿ, ಕರವೇ ಸಂಘಟನೆಗಳು ರಾಣಿ ಚನ್ನಮ್ಮ ವಿಶ್ವವಿದ್ಯಾಲಯದ ಸಂಗತಿಯಲ್ಲಿ ಜಾಣ ಮೌನ ತಾಳಿವೆ. ಇದೇ ಸಂಘಟನೆಯ ಹಿನ್ನೆಲೆಯಿಂದ ಬಂದವರೂ ವಿಶ್ವವಿದ್ಯಾಲಯದಲ್ಲಿದ್ದಾರೆ. ಅವರು ಕೂಡ ಕಂಡು ಕಾಣದಂತೆ ಇದ್ದಾರೆ. ಇದಕ್ಕೆ ಕುಲಸಚಿವರು ಹೊರತಾಗಿಲ್ಲ. ಮೂಕ ಪ್ರೇಕ್ಷಕರಾಗಿದ್ದಾರೆ. ಇದು ಅರ್ಥವಾಗದ ವಿಷಯವಾಗಿದೆ ಎಂದು ಜನ ಹೇಳುತ್ತಿದ್ದಾರೆ.

ಪದವೀಧರ ಕ್ಷೇತ್ರದ ಮಹಾಂತೇಶ ಕೌಜಲಗಿ, ಶಿಕ್ಷಕ ಮತಕ್ಷೇತ್ರದ ಅರುಣ ಶಹಾಪುರ, ರಾಜ್ಯಸಭೆ ಸದಸ್ಯ ಡಾ. ಪ್ರಭಾಕರ ಕೋರೆ, ಸಂಸದ ಸುರೇಶ ಅಂಗಡಿ, ಬಾಗಲಕೋಟ ಬಿವಿಎಸ್‌ನ ಈರಣ್ಣ ಚರಂತಿಮಠ, ವಿಜಾಪುರದ ಬಿಎಲ್‌ಡಿಇಯ ಎಂ.ಬಿ. ಪಾಟೀಲರು ‘ಆರ್‌ಸಿಯು’ವನ್ನು ಮರೆತಿದ್ದಾರೆ. ಇದರಿಂದ ಈ ಭಾಗದ ಹಿತಾಸಕ್ತಿಗೆ ಧಕ್ಕೆಯಾಗಿದೆ. ಇವರೆಲ್ಲರೂ ಹೀಗೇಕೆ ಮೌನದಿಂದಿದ್ದಾರೆ ಎಂಬುದು ನಾಗರಿಕರ ಪ್ರಶ್ನೆ.

ರಾಣಿ ಚನ್ನಮ್ಮ ವಿಶ್ವವಿದ್ಯಾಲಯ ಇತರೆ ವಿಶ್ವವಿದ್ಯಾಲಯಗಳಿಗೆ ಮಾದರಿಯಾಗುವಂತೆ ರೂಪುಗೊಳ್ಳಬೇಕು. ಈ ಜವಾಬ್ದಾರಿ ಸಿಂಡಿಕೇಟ್ ಮತ್ತು ವಿದ್ಯಾವಿಷಯಕ ಪರಿಷತ್ ಸದಸ್ಯರ ಮೇಲೆ ಇದೆ. ಆದರೆ ಅವರು ನಿಭಾಯಿಸುತ್ತಿಲ್ಲ. ಇದರಿಂದ ವಿಶ್ವವಿದ್ಯಾಲಯದಲ್ಲಿ ಇಷ್ಟೆಲ್ಲ ಹಗರಣ ನಡೆಯುತ್ತಿವೆ. ವಿಶ್ವವಿದ್ಯಾಲಯದ ಗುಣಮಟ್ಟ ಕೆಳ ದರ್ಜೆಗೆ ಇಳಿಯುತ್ತಿದೆ. ರಾಣಿ ಚನ್ನಮ್ಮನ ಹೆಸರಿಗೂ ಕಳಂಕ ತಗಲುತ್ತಿದೆ ಎಂದು ಗಡಿ ಭಾಗದ ಜನರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ವಿಶ್ವವಿದ್ಯಾಲಯ ಈ ಹಿಂದೆ ಪಠ್ಯ ಪುಸ್ತಕ ರಚನೆಯಲ್ಲೂ ವಿವಾದಕ್ಕೆ ಈಡಾಗಿತ್ತು. ಇದಕ್ಕೆ ಪರೀಕ್ಷಾ ಪದ್ಧತಿಯೂ ಹೊರತಲ್ಲ. ತನ್ನದೇ ಜಂಜಾಟಗಳಲ್ಲಿ ಮುಳುಗಿ ಹೋಗಿದ್ದ ಸರಕಾರ ಇವ್ಯಾವುಗಳನ್ನು ಕಿವಿಯ ಮೇಲೆ ಹಾಕಿಕೊಂಡಿರಲಿಲ್ಲ. ವಿಶ್ವವಿದ್ಯಾಲಯ ಘೋಷಣೆ ಮಾಡಿದ್ದಷ್ಟೇ ಬಂತು, ನಂತರ ಸುಮ್ಮನಾಗಿಬಿಟ್ಟಿತು. ಈಗ ಉತ್ತರ ಕರ್ನಾಟಕದವರೇ ಮುಖ್ಯಮಂತ್ರಿಯಾಗಿದ್ದಾರೆ. ಜಗದೀಶ ಶೆಟ್ಟರ್‌ಗೆ ರಾಣಿ ಚನ್ನಮ್ಮ ವಿಶ್ವವಿದ್ಯಾಲಯದ ಪರಿಸರವೆಲ್ಲವೂ ಗೊತ್ತು. ಅವರೇ ಈಗಿದನ್ನು ಸರಿಪಡಿಸಬೇಕೆಂದು ಜನ ಅಪೇಕ್ಷಿಸುತ್ತಿದ್ದಾರೆ.

ಮುಖ್ಯಮಂತ್ರಿಯವರು ಈ ವಿಶ್ವವಿದ್ಯಾಲಯದ ಅವ್ಯವಸ್ಥೆ ತಿದ್ದಬೇಕಾಗಿದೆ. ಜತೆಗೆ ವಿವಿಗೆ ಏನು ಬೇಕೋ ಅದನ್ನು ನೀಡಬೇಕಿದೆ. ನಮ್ಮವರೇ ಮುಖ್ಯಮಂತ್ರಿಯವರು ಇದ್ದಾಗ ಈ ಕೆಲಸ ಆಗದಿದ್ದರೆ, ಇನ್ನೆಂದೂ ದೊರೆಯದು. ಬೆಳಗಾವಿ ಬೆಳೆಯಬೇಕಾದರೆ, ಈ ವಿಶ್ವವಿದ್ಯಾಲಯ ಹೆಚ್ಚು ಸದೃಢವಾಗಿ ನಿಲ್ಲಬೇಕು. ಆಗ ಕನ್ನಡದ ಕಲರವ ದ್ವಿಗುಣಗೊಳ್ಳುತ್ತದೆ. ನೆಲದ ಎರಡನೇ ರಾಜಧಾನಿಗೆ ಮೆರಗು ಬರುತ್ತದೆ. ಬೆಳಗಾವಿ, ಬಾಗಲಕೋಟ ಮತ್ತು ವಿಜಾಪುರ ಜಿಲ್ಲೆಯ ಜನಪ್ರತಿನಿಧಿಗಳು ಇದನ್ನು ಗಂಭೀರವಾಗಿ ಪರಿಗಣಿಸಬೇಕೆಂದು ಗಡಿ ನಾಡಿನ ಜನರು ಸಲಹೆ ನೀಡುತ್ತಿದ್ದಾರೆ.

ವಿಶ್ವವಿದ್ಯಾಲಯದ ಕೊರತೆಗಳ ಬಗ್ಗೆ ಈ ಹಿಂದೆಯೂ ಮಾಧ್ಯಮಗಳಲ್ಲಿ ಬೆಳಕು ಚೆಲ್ಲಲಾಗಿತ್ತು. ಅಲ್ಲಿಂದ ಇಲ್ಲಿಯವರೆಗೆ ಅಂಥ ಹೇಳಿಕೊಳ್ಳುವ ಪ್ರಗತಿಗಳೇನೂ ಆಗಿಲ್ಲ. ಇದು ನಿರೀಕ್ಷೆ ಹೊತ್ತು ನಿಂತಿದ್ದವರಿಗೆ ಬೇಸರ ತರಿಸಿದೆ. ಇದನ್ನು ಹೋಗಲಾಡಿಸುವ ಜವಾಬ್ದಾರಿ ಸರಕಾರ ಮತ್ತು ಜನಪ್ರತಿನಿಧಿಗಳ ಮೇಲೆ ಇದೆ.

————–
ಅಭ್ಯರ್ಥಿಗಳು ಸಮಸ್ಯೆ ಬಗ್ಗೆ ತಿಳಿಸಬೇಕು
ಅಪಸ್ವರದ ಎಳೆ ಕಿವಿಗೆ ಬಿದ್ದಿತ್ತು. ಈ ಬಗ್ಗೆ ವಿಶ್ವವಿದ್ಯಾಲಯದ ಕುಲಪತಿಗಳನ್ನು ಸಂಪರ್ಕಿಸಿದಾಗ ಪ್ರತಿಭೆ ಮತ್ತು ಅರ್ಹತೆ ಆಧರಿಸಿಯೇ ನೇಮಕ ಮಾಡುತ್ತಿರುವುದಾಗಿ ತಿಳಿಸಿದರು. ನಾವೂ ಸಹ ಅದೇ ಸಲಹೆ ನೀಡಿದ್ದೇವೆ. ಆದರೆ, ಇಲ್ಲಿ ಅನ್ಯಾಯವಾಗಿರುವ ಬಗ್ಗೆ ಅಭ್ಯರ್ಥಿಗಳೇನಾದರೂ ತಮ್ಮ ಬಳಿಗೆ ಬಂದರೆ ನಿಶ್ಚಿತವಾಗಿಯೂ ನ್ಯಾಯ ಕೊಡಿಸಲು ಕ್ರಮ ಕೈಗೊಳ್ಳುತ್ತೇನೆ.
– ಮಹಾಂತೇಶ ಕೌಜಲಗಿ, ವಿಧಾನಪರಿಷತ್ ಸದಸ್ಯ, ಪದವೀಧರ ಮತಕ್ಷೇತ್ರ

ನೇಮಕದಲ್ಲಿ ಅವ್ಯವಹಾರ ಸಹಿಸಲಾಗದು
ನೇಮಕಾತಿಯಲ್ಲಿ ಅವ್ಯವಹಾರ ನಡೆದಿದ್ದರೆ ಅದನ್ನು ಸಹಿಸಿಕೊಳ್ಳಲು ಆಗುವುದಿಲ್ಲ. ಇದು ವಿಶ್ವವಿದ್ಯಾಲಯಕ್ಕೆ ಮಾರಕವಾಗುವುದರಿಂದ ಅದನ್ನು ತಡೆಯಲಾಗುವುದು. ಜತೆಗೆ ಇದೇ ವಿಷಯವಾಗಿ ಸಿಂಡಿಕೇಟ್ ಸದಸ್ಯರು ಮತ್ತು ಉನ್ನತ ಶಿಕ್ಷಣ ಸಚಿವರ ಜತೆಗೆ ಮಾತನಾಡುವೆ.
ಅರುಣ ಶಹಾಪುರ, ವಿಧಾನಪರಿಷತ್ ಸದಸ್ಯರು, ಶಿಕ್ಷಕ ಮತಕ್ಷೇತ್ರ

ಸುಮ್ಮನೆ ಕುಳಿತುಕೊಳ್ಳಲು ಸಾಧ್ಯವಿಲ್ಲ
ವಿಶ್ವವಿದ್ಯಾಲಯದ ವಿವಿಧ ಹುದ್ದೆಗಳ ನೇಮಕದಲ್ಲಿ ಅವ್ಯವಹಾರ ನಡೆದಿರುವುದು ನಿಜವೇ ಆದರೆ ಸೂಕ್ತ ಕ್ರಮಕ್ಕಾಗಿ ಸರಕಾರಕ್ಕೆ ಶಿಫಾರಸು ಮಾಡುತ್ತೇವೆ. ಹಿಂದೊಮ್ಮೆ ಕುಲಪತಿಗಳ ಜತೆ ಮಾತನಾಡಿದಾಗ ಉತ್ತರ ಕರ್ನಾಟಕಕ್ಕೆ ಆದ್ಯತೆ ನೀಡುವುದರ ಜತೆಗೆ ಪ್ರತಿಭೆ ಮತ್ತು ಅರ್ಹತೆಯೇ ಆಯ್ಕೆಯ ಮಾನದಂಡ ಆಗಬೇಕು ಎಂದು ಸಲಹೆ ನೀಡಿದ್ದೆ. ಅದು ಪಾಲನೆ ಆಗಿಲ್ಲ ಎಂದಾದರೆ ನಾವು ಸುಮ್ಮನೆ ಕುಳಿತುಕೊಳ್ಳಲು ಆಗುವುದಿಲ್ಲ.
– ಡಾ. ಪ್ರಭಾಕರ ಕೋರೆ, ರಾಜ್ಯ ಸಭಾ ಸದಸ್ಯರು

ವಾಸ್ತವವನ್ನು ನಾವೇ ಅರಿಯುತ್ತೇವೆ
ನೇಮಕಾತಿಯಲ್ಲಿ ಅವ್ಯವಹಾರ ನಡೆದಿದೆ ಎಂಬ ಆರೋಪ ನಮ್ಮ ಕಿವಿಯ ಮೇಲೂ ಬಿದ್ದಿದೆ. ಆದರೆ ವಿಶ್ವವಿದ್ಯಾಲಯದ ಕುಲಪತಿಗಳನ್ನು ಸಂಪರ್ಕಿಸಿದರೆ ಇದನ್ನು ಅಲ್ಲಗಳೆದಿದ್ದಾರೆ. ವಾಸ್ತವವನ್ನು ಸ್ವತಃ ನಾವೇ ತಿಳಿದುಕೊಳ್ಳುತ್ತೇವೆ. ಪ್ರತಿಭೆಗಳಿಗೆ ಅನ್ಯಾಯವಾಗಿದ್ದರೆ ಖಂಡಿತವಾಗಿಯೂ ಸರಕಾರದ ಮಟ್ಟದಿಂದಲೇ ಸೂಕ್ತ ಕ್ರಮ ಕೈಗೊಳ್ಳಲು ಹಚ್ಚುತ್ತೇವೆ. ವಿಶ್ವವಿದ್ಯಾಲಯದ ಭವಿಷ್ಯದ ದೃಷ್ಟಿಯಿಂದ ಇದು ನಾವು ಮಾಡಬೇಕಾದ ಕೆಲಸವಾಗಿದೆ. ಆ ಅರಿವು ನಮಗಿದೆ.
– ಸುರೇಶ ಅಂಗಡಿ, ಸಂಸದ, ಬೆಳಗಾವಿ

ಕೃಪೆ : ವಿಜಯ ಕರ್ನಾಟಕ| Jul 19, 2012

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s